Sekretari i Përgjithshëm i OKB-së, Antonio Guterres, shënoi sot 30-vjetorin e gjenocidit të vitit 1995 në Srebrenicë, duke bërë thirrje për vigjilencë dhe veprim global përballë rritjes së “gjuhës së urrejtjes, mohimit dhe përçarjes”, transmeton Anadolu.

“Sot shënohet 30-vjetori i gjenocidit në Srebrenicë – mizoria më e keqe në tokën evropiane që nga Lufta e Dytë Botërore”, tha Guterres në një deklaratë.

“Në korrik të vitit 1995, më shumë se 8.000 burra dhe djem myslimanë boshnjakë u vranë sistematikisht. Mijëra gra, fëmijë dhe të moshuar u zhvendosën me forcë, jetët e tyre u shkatërruan përgjithmonë. Qëllimi ishte eliminimi i myslimanëve boshnjakë në Srebrenicë”, theksoi ai.

Guterres tha se dita shërben si më shumë sesa thjesht përkujtim dhe vuri në dukje: “Kjo ditë nuk është vetëm një moment reflektimi. Është thirrje për vigjilencë dhe veprim”.

“Në një kohë kur gjuha e urrejtjes, mohimi dhe përçarja po fitojnë terren, ne duhet të qëndrojmë të vendosur për të vërtetën dhe drejtësinë”, tha shefi i OKB-së, duke theksuar nevojën për të “zbuluar shenjat e paralajmërimit të hershëm dhe për t’iu përgjigjur para se dhuna të zërë vend”.

“Ne duhet të respektojmë të drejtën ndërkombëtare, të mbrojmë të drejtat e njeriut, të mbështesim dinjitetin e çdo individi dhe të investojmë në pajtim dhe paqe”, deklaroi Guterres.