Shtetet e Bashkuara të Amerikës (SHBA) vendosën sanksione të reja të mërkurën ndaj dy kompanive më të mëdha të naftës ruse, Rosneft dhe Lukoil, duke përmendur "mungesën e angazhimit serioz" të Moskës ndaj një procesi paqeje për t'i dhënë fund luftës në Ukrainë, raporton Anadolu.

Departamenti i Thesarit tha në një deklaratë se masat synojnë sektorin e energjisë të Rusisë për të "degraduar aftësinë e Kremlinit për të mbledhur të ardhura për makinën e tij të luftës" dhe për të "mbështetur ekonominë e tij të dobësuar".

"Tani është koha për të ndaluar vrasjet dhe për një armëpushim të menjëhershëm", tha në deklaratë Sekretari i Thesarit, Scott Bessent.

"Duke pasur parasysh refuzimin e Presidentit (Vladimir) Putin për t'i dhënë fund kësaj lufte të pakuptimtë, Departamenti i Thesarit po vendos sanksione për dy kompanitë më të mëdha të naftës të Rusisë që financojnë makinën e luftës së Kremlinit. Thesari është i përgatitur të ndërmarrë veprime të mëtejshme nëse është e nevojshme për të mbështetur përpjekjet e Presidentit (Donald) Trump për t'i dhënë fund edhe një lufte tjetër", shtoi ai.

Njoftimi erdhi vetëm një ditë pasi një zyrtar i Shtëpisë së Bardhë konfirmoi se një takim i dytë i planifikuar midis Trumpit dhe Putinit ishte pezulluar.

Trump tha më 16 tetor se takimi do të zhvillohej brenda dy javësh, dhe ndërsa shkaku i ndryshimit të qëndrimit menjëherë nuk dihej, ai erdhi pas refuzimit nga Kremlini të një armëpushimi të menjëhershëm në Ukrainë, të kërkuar nga presidenti amerikan.