Presidenti i Serbisë, Aleksandar Vuçiq, tha se me Greqinë dëshirojnë të zhvillojnë bashkëpunimin në fushën e mbrojtjes dhe atë ushtarake, transmeton Anadolu.

Vuçiq në kryeqytetin serb Beograd, priti në takim ministrin e Mbrojtjes të Greqisë, Nikos Dendias.

"Me Dendias trajtuam çështjen e sigurisë. Dëshirojmë të zhvillojmë bashkëpunimin në fushat ushtarake dhe të mbrojtjes", shkroi Vuçiq në rrjetet sociale pas takimit që u mbajt mbyllur për media.

Duke theksuar se ndajnë një miqësi të gjatë dhe partneritet strategjik me Greqinë për të ruajtur paqen dhe stabilitetin në rajon, Vuçiq falënderoi Greqinë për mbështetjen e saj ndaj integritetit territorial dhe sovranitetit të Serbisë.

Në kuadër të takimeve të tij në Beograd, Dendias do të takohet me homologun serb Bratisllav Gashiq.