Senatori amerikan, Mark Warner, ka paralajmëruar se tërheqja e SHBA-së nga NATO do të dobësonte sigurinë amerikane dhe do të inkurajonte kundërshtarë si Rusia dhe Kina, pasi presidenti Donald Trump sinjalizoi se po e shqyrton një lëvizje të tillë, transmeton Anadolu.

“Ajo që propozon presidenti do të shkatërronte dekada të tëra udhëheqjeje dypartiake amerikane, do të minonte besueshmërinë tonë tek aleatët dhe do të inkurajonte kundërshtarë si Rusia dhe Kina, të cilët nuk do të dëshironin asgjë më shumë sesa një aleancë transatlantike të përçarë”, tha demokrati nga Virxhinia në një deklaratë.

“Për më shumë se 70 vjet, NATO ka qenë themeli i sigurisë kombëtare amerikane”, tha Warner, duke e quajtur aleancën “aleanca ushtarake më e suksesshme në historinë moderne”.

Ai e përshkroi kërcënimin e Trumpit për t’u larguar nga NATO si “të pamatur” dhe “të rrezikshëm”, duke paralajmëruar se kjo do të “luante drejtpërdrejtë në duart e kundërshtarëve tanë”.

Warner gjithashtu hodhi poshtë pretendimet se aleanca është e njëanshme, duke theksuar se NATO u aktivizua pas sulmeve të 11 shtatorit, kur aleatët mbështetën Washingtonin dhe dërguan trupa në Afganistan.

“Të sugjerosh tani se kjo aleancë është një rrugë njëkahëshe jo vetëm që është e gabuar, është një fyerje për ato sakrifica”, tha ai.

Komentet e tij erdhën pasi Trump kritikoi aleatët e NATO-s për refuzimin për të mbështetur luftën SHBA-Izrael kundër Iranit dhe kërcënoi të tërhiqet nga aleanca.

Në një intervistë për gazetën The Telegraph, Trump e quajti NATO-n një “tigër prej letre” dhe tha se largimi është “përtej rishqyrtimit”.

Mosmarrëveshja vjen derisa shumë anëtarë të NATO-s kanë refuzuar t’i bashkohen përpjekjeve për rihapjen e Ngushticës së Hormuzit, një rrugë jetike globale për naftën e ndërprerë nga lufta SHBA-Izrael kundër Iranit, duke bërë thirrje njëkohësisht për ulje të tensioneve.