Kryetari i Komitetit për Marrëdhënie të Jashtme të senatit amerikan, Jim Risch, thotë se do të pauzojë sanksionet ndaj Turqisë, raporton Anadolu Agency (AA).

"Ndoshta është më mirë që ne të mos miratojmë ligjin për sanksione për momentin", Risch u tha përfaqësuesve të mediave në zyrën e tij, duke iu referuar bisedimeve midis SHBA-ve dhe Turqisë për blerjen e sistemit raketor rus S-400.

Risch mori pjesë në takimin e së mërkurës mes presidentit turk Recep Tayyip Erdoğan dhe homologut të tij amerikan, Donald Trump, të mbajtur në Zyrën Ovale së bashku me disa senatorë të tjerë republikanë.

Ai e quajti takimin "shumë terapeutik".

Disa çështje u diskutuan, duke përfshirë edhe blerjen e sistemit rus S-400 nga ana e Ankarasë, avionin luftarak F-35, shkëmbimin tregtar dhe pauzimin e operacionit të Turqisë në Sirinë veriore.

"Presidenti Erdoğan akoma nuk është aty, por është propozim 'jep dhe merr'", tha ai, duke shtuar se "ai është shumë i vetëdijshëm për vendimet që duhet të marrë dhe për pasojat nga ato vendime."

Blerja e sistemit të avancuar rus për mburojë raketore nga ana e Turqisë shkaktoi që administrata e Trumpit në muajin korrik të largojë Turqinë nga programi i avionit luftarak të gjeneratës së pestë F-35.

SHBA pohon se sistemi mund të përdoret nga Rusia për të fituar detaje të klasifikuara për avionin dhe se nuk është në përputhje me sistemet e NATO-s.

Megjithatë, Turqia pohon se sistemi S-400 nuk do të integrohet në sistemet e NATO-s, e as nuk paraqet kërcënim për aleancën.