Sekretari Rubio u kërkon diplomatëve amerikanë që t'i nxisin vendet për veprime të shpejta kundër Iranit
Raportohet se direktiva e lëshuar për të gjitha postet diplomatike, është pjesë e një "kërkese veprimi" të etiketuar "Shqetësim i Rritur i Aktivitetit të IRGC-së", duke iu referuar Korpusit të Gardës Revolucionare Islamike të Iranit
Washington
Sekretari i Shtetit i SHBA-së, Marco Rubio, u kërkoi diplomatëve amerikanë në mbarë botën që të ushtrojnë presion mbi qeveritë e huaja që të veprojnë shpejt për të zvogëluar aftësitë e Iranit dhe ato të grupeve të lidhura me Iranin, duke përmendur një "rrezik të shtuar sulmi", transmeton Anadolu.
Sipas raportimeve në median lokale të hënën, direktiva e lëshuar për të gjitha postet diplomatike dhe konsullore, është pjesë e një "kërkese veprimi" të etiketuar "Shqetësim i Rritur i Aktivitetit të IRGC-së", duke iu referuar Korpusit të Gardës Revolucionare Islamike të Iranit. Telegrami udhëzon zyrtarët amerikanë që ta japin mesazhin "në nivelin më të lartë të përshtatshëm" deri më 20 mars.
"Me rrezikun e shtuar të sulmit nga Irani dhe partnerët dhe përfaqësuesit e tij, të gjitha qeveritë duhet të veprojnë me shpejtësi për të zvogëluar aftësitë e Iranit dhe grupeve terroriste të lidhura me Iranin për të sulmuar kombet dhe qytetarët tanë përkatës", tha kabllogrami.
Më tej theksohet se "Ne duhet të veprojmë ndërsa vëmendja ndërkombëtare është përqendruar tani për t'i dhënë fund fushatës iraniane të terrorit në Lindjen e Mesme dhe në nivel global. Mos lejoni që kjo lëvizje kritike të kalojë".
Sipas kabllogramit, diplomatët në vendet që ende nuk e kanë përcaktuar IRGC-në dhe Hezbollahun si organizata terroriste janë të udhëzuar të inkurajojnë qeverinë e tyre që ta bëjë këtë "shpejt".
"Një përcaktim i tillë do të intensifikojë presionin mbi regjimin iranian dhe do të kufizojë aftësinë e tij për të sponsorizuar aktivitete terroriste në të gjithë globin që rrezikojnë sigurinë dhe mbrojtjen e popullatave tuaja", tha kabllogrami.
Tensionet në Lindjen e Mesme janë përshkallëzuar që kur SHBA-ja dhe Izraeli nisën një sulm në shkallë të gjerë ndaj Iranit më 28 shkurt, duke vrarë më shumë se 1.300 njerëz, përfshirë Udhëheqësin Suprem të atëhershëm, Ali Khamenei.
Irani është hakmarrë me sulme me dronë dhe raketa që kanë shënjestruar Izraelin, Jordaninë, Irakun dhe vendet e Gjirit që strehojnë asete ushtarake amerikane.
Një total prej 13 ushtarësh amerikanë janë vrarë dhe rreth 200 të tjerë janë plagosur që nga fillimi i operacionit.
Në ueb-faqen e Anadolu Agency mbi sistemin rrjedhës të lajmeve të AA një pjesë e lajmeve të ofruara ndaj abonentëve publikohen duke u përmbledhur. Për abonim ju lutemi na kontaktoni.
