Rusia tha sot se Shtetet e Bashkuara, pas një apeli nga Moska, kanë vendosur të lirojnë dy shtetas rusë që ishin pjesë e ekuipazhit të cisternës së naftës “Marinera”, e cila më parë u sekuestrua nga forcat amerikane në Atlantikun Verior, transmeton Anadolu.

Zëdhënësja e Ministrisë së Jashtme të Rusisë, Maria Zakharova, tha se vendimin e mori presidenti i SHBA-së, Donald Trump, duke shtuar se Moska e mirëpriti këtë hap dhe i shprehu falënderime udhëheqjes amerikane.

“Si përgjigje ndaj apelit tonë, presidenti i SHBA-së, Donald Trump, vendosi të lirojë dy shtetas rusë nga ekuipazhi i cisternës‘Marinera’, të cilët më parë ishin ndaluar nga pala amerikane gjatë një operacioni në Atlantikun Verior”, tha Zakharova në një deklaratë.

Ajo shtoi se Rusia ka nisur punën praktike urgjente për të zgjidhur të gjitha çështjet që lidhen me kthimin e shpejtë të qytetarëve të liruar në vendin e tyre.

Ky njoftim erdhi pas dënimit të fortë nga Moska për sekuestrimin nga SHBA-ja të tankerit me flamur rus, i njohur më parë si “M/V Bella 1”. Autoritetet ruse e përshkruan operacionin si një veprim ushtarak të paligjshëm dhe shkelje të rëndë të ligjit ndërkombëtar detar.

Rusia kishte kërkuar lirimin e menjëhershëm të anijes dhe ekuipazhit të saj, duke refuzuar pretendimet e Washingtonit se cisterna ishte pa flamur ose operonte nën flamur të rremë.