Zëdhënësi i Kremlinit, Dmitry Peskov tha sot se presidenti rus, Vladimir Putin është ftuar të bashkohet me "Bordin e Paqes", një organ i ri ndërkombëtar që synon adresimin e konflikteve, duke filluar me situatën në Gaza, transmeton Anadolu.

Duke folur në një konferencë për mediat në Moskë, Peskov tha se Rusia po e analizon propozimin.

"Po, me të vërtetë, presidenti Putin përmes kanaleve diplomatike, mori ftesë për t'u bashkuar me këtë Këshill të Paqes. Për momentin, ne po shqyrtojmë të gjitha detajet e këtij propozimi, përfshirë shpresën për kontakte me palën amerikane për të sqaruar të gjitha nuancat", tha ai.

Shtëpia e Bardhë njoftoi formimin e Bordit të Paqes në një deklaratë të premten, duke e përshkruar atë si të destinuar të "luajë rol thelbësor në përmbushjen" e 20 pikave të planit të presidentit Trump për t'i dhënë fund përgjithmonë luftës së Izraelit në Gaza dhe për të rindërtuar enklavën si dhe "të ofrojë mbikëqyrje strategjike, të mobilizojë burimet ndërkombëtare dhe të sigurojë llogaridhënie ndërsa Gaza kalon nga konflikti në paqe dhe zhvillim".

SHBA-ja gjithashtu formoi Komitetin Kombëtar për Administrimin e Gazës (NCAG) për të zbatuar fazën e dytë të planit gjithëpërfshirës të Trumpit për t'i dhënë fund konfliktit në Gaza, së bashku me një Bord ekzekutiv themelues dhe një Bord ekzekutiv të Gazës në mbështetje të NCAG-ut.

Trump ka ftuar gjithashtu udhëheqës të tjerë botërorë që t'i bashkohen Bordit të Gazës, përfshirë presidentin turk Recep Tayyip Erdogan.