Rusia po përpiqet të forcojë sovranitetin e saj ekonomik përballë sanksioneve të shumta perëndimore duke zhvilluar strategji të reja logjistike dhe financiare, si Korridori Ndërkombëtar i Transportit Veri-Jug (INSTC) dhe Ura BRICS, me synim shmangien e izolimit ekonomik, raporton Anadolu.

Tensionet gjeopolitike po ndikojnë në rrugët tradicionale detare në Mesdhe, Detin e Zi dhe Detin Baltik ndërsa Moska po diversifikon tregtinë drejt Lindjes së Mesme dhe Azisë.

Në qendër të këtij orientimi të ri është INSTC, një rrjet prej 7.200 kilometrash që kombinon transportin detar, hekurudhor dhe rrugor, duke lidhur Rusinë me Indinë përmes Iranit. Kjo rrugë shihet si alternativë ndaj Kanalit të Suezit, duke shkurtuar distancën e transportit me rreth 40 për qind dhe duke ulur kohën e dërgesave nga 45 ditë në më pak se 25 ditë.

Irani, me mbështetje financiare ruse, po punon për përfundimin e lidhjeve hekurudhore të paplota dhe modernizimin e porteve në Detin Kaspik, çka pritet të ulë kostot e transportit të kontejnerëve me rreth 30 për qind.

Vitin e kaluar, rreth 30 milionë tonë mallra u vlerësuan se kaluan përmes INSTC-së ndërsa kapaciteti vjetor synohet të arrijë në 45 milionë tonë deri në vitin 2030.

Rusia gjithashtu po zhvillon sisteme alternative financiare për të mbrojtur tregtinë nga rregulloret perëndimore dhe sistemi SWIFT. Ura BRICS paraqitet si një platformë alternative pagesash që lidh monedhat digjitale të bankave qendrore të vendeve anëtare të BRICS-it.

Platforma, e bazuar në teknologjinë blockchain, ka hyrë në fazë të avancuar pilotimi, me transaksione të kontrolluara midis Rusisë, Kinës, Emirateve të Bashkuara Arabe dhe Iranit.

Sistemi synon të eliminojë nevojën për banka korrespondente, duke mundësuar transferta direkte përmes portofolëve digjital të bankave qendrore dhe duke reduktuar kostot e transaksioneve deri në 40 për qind.

Megjithatë, strategjitë e Rusisë përballen me sfida të shumta. Mangësitë infrastrukturore në Iran, përfshirë vonesat në ndërtimin e linjës hekurudhore Rasht-Ashara si dhe rreziqet gjeopolitike rajonale, vazhdojnë të pengojnë funksionimin e plotë të korridorit.

Ministri rus i Energjisë, Sergey Tsivilev njoftoi se marrëveshja për nisjen e projektit hekurudhor pritet të nënshkruhet më 1 prill.

Në aspektin financiar, zgjerimi i Urës BRICS ngadalësohet nga shqetësimet e vendeve anëtare për sanksione dytësore nga SHBA-ja. Ndërkohë, tregtia në monedha kombëtare ka krijuar çekuilibra likuiditeti, si në rastin e Rusisë që grumbulloi rupi indiane të pashfrytëzueshme nga shitjet e naftës.

Ekspertët theksojnë se për funksionimin efektiv të këtyre mekanizmave kërkohet digjitalizimi dhe modernizimi i shpejtë i procedurave doganore në të gjitha vendet partnere të tranzitit.