Negociatat e Gjenevës për Ukrainën do të mbulojnë një gamë më të gjerë temash krahasuar me raundet në Abu Dhabi, përfshirë çështjet kryesore që lidhen me territoret, tha sot zëdhënësi i Kremlinit, Dmitry Peskov, transmeton Anadolu.

Duke folur në një konferencë për mediat në Moskë, ai tha se diskutimi i këtyre çështjeve kërkon praninë e kreut të delegacionit rus, i cili mungonte në bisedimet në Emiratet e Bashkuara Arabe.

"Këtë herë synohet të diskutohet një spektër më i gjerë pyetjesh, përfshirë në fakt çështjet kryesore që kanë të bëjnë si me territoret ashtu edhe me gjithçka tjetër. Këto lidhen me kërkesat tona. Këtu na duhet prania e kryenegociatorit, përkatësisht Vladimir Medinskyt", tha ai.

Delegacioni rus për bisedimet e ardhshme në Gjenevë do të zgjerohet. Zëvendësministri i Jashtëm, Mikhail Galuzin dhe shefi i Drejtorisë Kryesore të Inteligjencës së Shtabit të Përgjithshëm Igor Kostyukov i janë bashkuar ekipit, tha Peskov.

"Delegacioni me të vërtetë do të zgjerohet këtë herë. Përveç Medinskyt do të jetë edhe zëvendësministri i Jashtëm Mikhail Galuzin dhe zyrtarë të tjerë", deklaroi zëdhënësi i Kremlinit.

I pyetur pse Medinsky nuk mori pjesë në raundet e mëparshme në Abu Dhabi, Peskov tha se ishte "sepse ato u përqendruan posaçërisht në çështjet e sigurisë".

Vladimir Medinsky vazhdon të kryesojë delegacionin negociues rus për Ukrainën, tha ai.

I dërguari presidencial rus, Kirill Dmitriev do të marrë pjesë gjithashtu në negociatat e Gjenevës. Ai do të punojë veçmas brenda një grupi bashkëpunimi ekonomik me SHBA-në, sipas Peskovit.

Raundi fillestar i konsultimeve trepalëshe për sigurinë midis Rusisë, Ukrainës dhe SHBA-së u mbajt më 23-24 janar në Abu Dhabi. Një raund i dytë bisedimesh pasoi në të njëjtin vend më 4-5 shkurt.