Rusia ka dëbuar sekretarin e dytë të Ambasadës së Britanisë së Madhe në Moskë, Jance Gerardus, me akuza për aktivitete inteligjence, njoftoi sot Shërbimi Federal i Sigurisë Ruse (FSB), transmeton Anadolu.

FSB-ja në një deklaratë tha se akreditimi i Gerardusit ishte revokuar dhe se ai duhet të largohet nga Rusia brenda dy javësh. "Është vërtetuar me siguri se sekretari i dytë Jance Van Rensburg Albertus Gerardus, i lindur më 6 janar 1996 kur aplikoi për leje për të hyrë në vendin tonë dha qëllimisht informacion të rremë, duke shkelur kështu ligjin rus", tha FSB-ja.

Sipas shërbimit të inteligjencës, Gerardus u përpoq të merrte informacion të ndjeshëm gjatë takimeve joformale me ekspertë ekonomikë rusë, të cilat u regjistruan.

"FSB-ja e Rusisë ka identifikuar shenja se ky diplomat po kryente aktivitete inteligjence dhe subversive që kërcënonin sigurinë e Federatës Ruse", shtoi ajo.

Ministria e Jashtme ruse tha se e ngarkuara e përkohshme britanike me punë, Danae Dholakia u thirr për çështjen dhe do t'i paraqitet notë diplomatike proteste dhe do të informohet zyrtarisht për kërkesën që Gerardus të largohet nga vendi.