Një polic u vra dhe dy të tjerë u plagosën sot në një shpërthim jashtë stacionit hekurudhor Savyolovsky në kryeqytetin e Rusisë, Moskë, njoftoi Ministria e Brendshme Ruse, transmeton Anadolu.

"Sipas të dhënave paraprake, si rezultat i veprimeve të kriminelit, një oficer i policisë së trafikut pësoi lëndime të papajtueshme me jetën", tha ministria.

Në një deklaratë të veçantë, Komiteti Hetimor Rus tha se edhe autori i krimit vdiq në shpërthim.

"Është vërtetuar se natën e 23-24 shkurtit, një person iu afrua tre oficerëve të Inspektoratit Shtetëror të Sigurisë së Trafikut që ishin në detyrë në Sheshin e Stacionit Hekurudhor Savyolovsky në Moskë dhe kreu një vetëshpërthim", tha Komiteti.

Si pjesë e hetimit, është kryer inspektim ndërsa u urdhëruan ekzaminimet e nevojshme mjeko-ligjore, përfshirë analiza gjenetike, mjekësore dhe të eksplozivëve, tha komiteti.

"Identiteti i personit që aktivizoi pajisjen shpërthyese po përcaktohet", shtoi ai.

Një çështje penale është hapur për sulmin ndaj oficerëve të policisë sipas dy neneve, sulm ndaj jetës së një oficeri të zbatimit të ligjit dhe trafikim i paligjshëm i pajisjeve shpërthyese.