Në rrethin Nadezhdinsky të rajonit Primorski të Rusisë, një tigër siberian (tigër i Amurit), i cili kishte zbritur në zonat e banuara duke shkaktuar panik, u kap në një operacion të kryer nga ekipe të specializuara, transmeton Anadolu.

Sipas një njoftimi të qeverisë rajonale, tigri, i klasifikuar si "konfliktual" (që ka pasur kontakt me njerëzit dhe ka shfaqur agresivitet), prej kohësh shqetësonte banorët e zonës.

Së fundmi, më 6 janar, tigri sulmoi dhe vrau një kalë, ndërsa për shkak se përbënte rrezik për sigurinë, u kap pasi u qetësua me anestezi.

Autoritetet bënë të ditur se tigri i kapur u dërgua në një qendër rehabilitimi për t'iu nënshtruar kontrollit shëndetësor dhe për të përcaktuar shkaqet e çrregullimeve në sjellje.

Pas ekzaminimeve të kryera në qendër, u raportua se tigri u rikthye në natyrë.

Në lindjen e largët të Rusisë, këta tigra, të cilët janë ndër speciet e rrezikuara nga zhdukja në nivel botëror, po përballen me zvogëlimin e habitateve të tyre natyrore, çka ka bërë që raste të ngjashme të shënohen më shpesh kohët e fundit.