Ministria e Mbrojtjes e Rumanisë ka bërë të ditur se SHBA-ja do të reduktojë praninë e saj në disa vende të krahut lindor, përfshirë Rumaninë, pasi aleatët e NATO-s u informuan zyrtarisht për vendimin, transmeton Anadolu.

Duke cituar një deklaratë të ministrisë rumune, portali i lajmeve "Romania Insider" raportoi se SHBA-ja i ka njoftuar aleatët e tyre se do të reduktojnë një pjesë të pranisë së trupave të tyre në krahun lindor të NATO-s.

Sipas autoriteteve rumune, lëvizjet e trupave nuk janë një tërheqje, por fundi i rotacioneve në Rumani, Bullgari, Sllovaki dhe Hungari pasi rreth 1 mijë ushtarë do të mbeten në vend.

"Ri-organizimi i forcave amerikane përfaqëson një pasojë të prioriteteve të reja të administratës presidenciale, të shpallura që në muajin shkurt", tha ministria rumune, duke iu referuar administratës së presidentit Donald Trump, që u rikthye më 20 janar për një mandat të dytë.

"Vendimi mori në konsideratë edhe faktin se NATO ka forcuar praninë dhe aktivitetin e saj në krahun lindor, gjë që i lejon SHBA-së të përshtatë qëndrimin e saj ushtarak në rajon", theksohet më tej.

Sipas raportit, rreth 800 trupa amerikane do të tërhiqen kryesisht nga Baza Ajrore Mihail Kogalniceanu, ndërsa ekipet në Deveselu dhe Campia Turzii mbeten të pandryshuara.

Ky veprim vjen pas një raporti në muajin prill nga "NBC News" se SHBA-ja po shqyrton tërheqjen e rreth gjysmës së trupave që tani janë të pranishme në Evropën Lindore.

Administrata amerikane ka theksuar se aleatët e saj në NATO duhet të bëjnë më shumë për të mbrojtur veten, me presidentin Trump i cili shpesh e ka kritikuar aleancën shumëvjeçare të mbrojtjes.

NATO-ja ende nuk është prononcuar për këtë çështje.