Numri i të vdekurve në një operacion kundër drogës të kryer nga forcat e sigurisë në rajonin e Rio de Janeiros të Brazilit më 28 tetor është rritur në 132, transmeton Anadolu.

Sipas lajmeve në mediat braziliane, forcat e sigurisë kryen operacion kundër drogës ndaj "Comando Vermelho", një nga organizatat më të mëdha kriminale të vendit, në lagjet Penha dhe Alemao, të njohura si "favela" (lagje të varfra) në veri të Rio de Janeiros.

Numri i të vdekurve në përleshjet që shpërthyen gjatë operacionit është rritur në 132 persona, përfshirë katër oficerë policie. Banorët e lagjes Penha mblodhën në sheshin "Sao Lucas" trupat e 72 personave të vrarë në operacion.

Postimet në mediat sociale treguan disa njerëz duke qarë mbi trupat e disa personave. Banorët e lagjes u bënë thirrje autoriteteve për evakuimin dhe identifikimin e trupave. Guvernatori i Rio de Janeiros, Claudio Castro, e përshkroi operacionin si "historik" dhe përgëzoi forcat e sigurisë.

Në operacion u arrestuan 80 persona, përfshirë Thiago do Nascimento Mendes, i njohur edhe si "Belao do Quitungo", një nga udhëheqësit e organizatës kriminale ndërsa u konfiskuan armë me tytë të gjatë dhe dronë të shumtë.

Në operacionin e quajtur "Operaçao Contençao", u përfshinë rreth 2.500 pjesëtarë të sigurisë, automjete të blinduara dhe helikopterë. Operacioni synonte t'i jepte goditje të madhe organizatës "Comando Vermelho", e cila ka ndikim në 20 rajone të vendit, veçanërisht në Rio de Janeiro.

Mediat braziliane ka vënë në dukje se operacioni është regjistruar si operacioni më vdekjeprurës policor në historinë e Amerikës së Jugut. Ndërkohë, organizatat e të drejtave të njeriut dhe përfaqësuesit e shoqërisë civile në vend e përshkruan ndërhyrjen e policisë si "masakër" dhe kërkuan hetim ndërkombëtar.

Në një deklaratë më 28 tetor, guvernatori i Rio de Janeiros, Claudio Castro tha se operacioni kundër drogës u krye për të ndaluar përhapjen e organizatës kriminale "Comando Vermelho" në rajon.