Thirrjet po shtohen për të ndaluar hyrjen e presidentit të Izraelit Isaac Herzog në Australi, përderisa ligjvënësit debatojnë një mocion që i kërkon Canberra-s të tërheqë ftesën që i është bërë atij, transmeton Anadolu.

Senatori i Partisë së Gjelbër të Australisë, David Shoebridge, tha se partia e tij e paraqiti mocionin në Senat, duke i bërë thirrje kryeministrit Anthony Albanese të revokojë ftesën për Herzog, i cili pritet të vizitojë vendin javën e ardhshme.

Herzog "ka nënshkruar fjalë për fjalë bombat e përdorura në gjenocidin në Gaza. Partia Laburiste, Liberalet dhe Një Komb u bashkuan për ta kundërshtuar", tha Shoebridge, i cili përfaqëson Uellsin e Ri Jugor në dhomën e sipërme të parlamentit australian.

"Kjo tregon gjithçka", shtoi Shoebridge.

Herzog pritet të zbarkojë në Sydney më 8 shkurt për një vizitë katër-ditore.

Javën e kaluar, një koalicion i grupeve të shoqërisë civile paraqiti një ankesë ligjore duke i kërkuar autoriteteve t'i mohojnë Herzog vizën dhe të hapin një hetim penal sipas ligjit australian.

Ankesa u paraqit nga Këshilli Kombëtar Australian i Imamëve (ANIC), së bashku me Këshillin Hebraik të Australisë dhe Fondacionin Hind Rajab, te prokuroria e përgjithshme, ministria e punëve të brendshme dhe policia federale.

Më parë, avokatë të shquar australianë të drejtësisë kërkuan gjithashtu që policia federale të hetojë Herzogun për nxitje të gjenocidit përpara vizitës së tij.

Qendra Australiane për Drejtësi Ndërkombëtare, së bashku me grupet palestineze të avokatisë, përfshirë Al Haq dhe Qendrën Al Mezan për të Drejtat e Njeriut, thanë në një kërkesë zyrtare se do të ishte e papranueshme që Herzogu, i cili akuzohet për nxitje të gjenocidit, të hynte në Australi pa pasoja.

Herzog u ftua nga Kryeministri Albanese pas sulmit në Bondi Beach në dhjetor, i cili vrau 15 persona dhe plagosi 42 të tjerë.

"Sigurisht që e mirëpres ardhjen [e Herzogut] dhe mezi pres ta vizitoj, dhe vërej se Anne Aly ka bërë edhe komente të përshtatshme, duke mirëpritur faktin se kjo do të ndodhë, duke mirëpritur çdo gjë që çon në një ndjenjë më të madhe uniteti. Ne duhet të ndërtojmë kohezion shoqëror në këtë vend", u tha Albanese gazetarëve javën e kaluar.

Një komision i posaçëm hetimor i Këshillit të të Drejtave të Njeriut të OKB-së për luftën në Rripin e Gazës zbuloi vitin e kaluar se Izraeli po kryente gjenocid dhe tha se komentet e bëra nga Herzog pas sulmit të Hamasit më 7 tetor 2023 ishin prova të qëllimit gjenocidal.