Të paktën 6 persona kanë humbur jetën si pasojë e rrëzimit në det të një avioni të vogël me 17 persona në bord , në shtetin e Amerikës Qendrore, Honduras, transmeton Anadolu.

Guvernatori i Roatan-it, Hugo Varela, në një deklaratë për gazetarët, tha se avioni, i cili u ngrit nga Aeroporti "Juan Manuel Galvez" për të shkuar në qytetin Trujillo, u rrëzua në det në brigjet e ishullit Roatan menjëherë pas nisjes.

Ai njoftoi se gjatë punimeve të kërkim-shpëtimit deri më tani kanë arritur në trupat e pajetë të 6 personave, duke treguar se ekipet vazhdojnë punën në terren.

Sipas mediave lokale, avioni ka marrë flakë pasi është rrëzuar në det. Për këtë arsye, përpjekjet e kërkim-shpëtimit po vazhdojnë me vështirësi.