Raportuesja Speciale e Kombeve të Bashkuara (OKB) për Palestinën, Francesca Albanese, i ka bërë thirrje UEFA-s që të përjashtojë Izraelin nga garat pas vdekjes së legjendës palestineze të futbollit Suleiman Al-Obeid, i njohur me nofkën “Pele palestinez”, në një sulm izraelit, transmeton Anadolu.

Duke etiketuar UEFA-n dhe duke iu referuar postimit të organit evropian të futbollit në lidhje me vdekjen e Al-Obeidit, Albanese ka shkruar në X: “UEFA, është koha për të përjashtuar vrasësit (e Al-Obeidit) nga garat. Le ta pastrojmë sportin tonë nga aparteidi dhe gjenocidi”.

- Pele i Palestinës vritet në sulmin izraelit

Ish-lojtari i ekipit kombëtar palestinez Suleiman Al-Obeid u vra në një sulm izraelit në Gaza të mërkurën.

Federata Palestineze e Futbollit (PAF) lëshoi një deklaratë ku thuhej: “Ish-lojtari i ekipit kombëtar Suleiman Al-Obeid u martirizua gjatë një sulmi nga forcat pushtuese ndërsa priste ndihmë humanitare në Rripin e Gazës”.

Al-Obeid, 41 vjeç, i lindur në Gaza, i martuar dhe me pesë fëmijë, konsiderohej një nga yjet më të ndritshëm në historinë e futbollit palestinez. Ish-lojtari ka shënuar dy gola në 24 ndeshje zyrtare për ekipin kombëtar palestinez.