Guangzhou, qyteti i tretë më i madh i Kinës, po përpiqet të mbajë nën kontroll rritjen më të madhe të rasteve që nga fillimi i pandemisë COVID-19, transmeton Anadolu Agency (AA).

Në qytetin me 18 milionë banorë, që është qendra e provincës Guangdong në jug të vendit, në 24 orët e fundit janë zbuluar 122 raste me simptoma dhe 1.813 raste pa simptoma.

Ndërkohë që numri i rasteve ka arritur nivelin më të lartë që nga fillimi i pandemisë, masat e karantinës janë shtuar në qytet.

"Qyteti po përballet me situatën më komplekse dhe të vështirë të parandalimit dhe kontrollit të pandemisë në 3 vitet e fundit," tha Cang Yi, nënkryetar i Komisionit Shëndetësor në Guangzhou, në një konferencë shtypi në fundjavë.

Cang Coubin, Sekretar i Qendrës për Kontrollin dhe Parandalimin e Sëmundjeve në Guangzhou, gjithashtu tha se shumica e rasteve të reja ishin shkaktuar nga nënvarianti Omicron "BA.5.2".

Ndërsa një ditë më parë në qytet u zbuluan 746 raste të reja, dje numri u rrit në 1325.

Më shumë se 31.000 njerëz që jetojnë në zonë thuhet se u dërguan në qytete të tjera të provincës për të zvogëluar rrezikun e përhapjes.

Rastet janë në rritje edhe në Pekin

Ndërsa në kryeqytetin Pekin po shfaqen raste të reja, numri i zonave me rrezik të lartë dhe të mesëm po rritet. Pardje në qytet janë zbuluar 49 raste dhe dje 59 raste.

Qendra e Pekinit për Kontrollin dhe Parandalimin e Sëmundjeve njoftoi se rastet e reja rezultuan nga grupimet e epidemive në disa kampuse universitare dhe përhapja e brendshme.

5.643 në 24 orët e fundit

Sipas deklaratës së Komisionit Kombëtar të Shëndetësisë, në Kinë në 24 orët e fundit janë zbuluar 569 raste me simptoma sëmundjeje dhe 5.074 raste pa simptoma, ndërsa numri i rasteve ditore ka arritur nivelin më të lartë në 6 muajt e fundit.

Megjithëse numri i rasteve është i ulët në popullatë dhe shumica e tyre nuk shfaqin simptoma, Kina vazhdon të zbatojë masa të rrepta të kontrollit të epidemisë të quajtur "zero raste".