Presidenti rus, Vladimir Putin do të zhvillojë vizitë zyrtare në Kazakistan në fund të majit, tha Kremlini, transmeton Anadolu.

Sipas një deklarate të Kremlinit, presidenti i Kazakistanit, Kassym-Jomart Tokayev e ftoi Putinin të zhvillojë vizitë shtetërore në Kazakistan në lidhje me takimin e ardhshëm të Këshillit të Lartë Ekonomik Euroaziatik në Astana në fund të majit.

"Vladimir Putini konfirmoi se do të marrë pjesë në takimin e Këshillit të Lartë Ekonomik Euroaziatik që do të mbahet në fund të majit në Astana. Kassym-Jomart Tokayev e ftoi presidentin e Rusisë të zhvillojë vizitë shtetërore në Kazakistan lidhur me pjesëmarrjen në këtë ngjarje. Ftesa e tij u pranua me mirënjohje", tha deklarata.

Dy udhëheqësit diskutuan gjithashtu mbi zhvillimin e marrëdhënieve ekonomike dypalëshe dhe shkëmbyen pikëpamje mbi çështjet ndërkombëtare, tha Kremlini.

Këshilli i Lartë Ekonomik Euroaziatik është organi drejtues i Bashkimit Ekonomik Euroaziatik (EAEU), një organizatë rajonale bashkëpunimi ekonomik që përfshin disa shtete euroaziatike. I themeluar në janar 2015, EAEU përfshin Armeninë, Bjellorusinë, Kazakistanin, Kirgistanin dhe Rusinë.