Presidenti rus Vladimir Putin tha sot se ishte gati të merrte në konsideratë ndalimin e sulmeve thellë brenda Ukrainës në ditën e zgjedhjeve, nëse ato do të mbahen, transmeton Anadolu.

Duke folur në një konferencë të posaçme për mediat në Moskë, Putini e kushtëzoi armëpushimin me pjesëmarrjen në zgjedhje të qytetarëve ukrainas që jetojnë në Rusi.

"Ne jemi gati të marrim në konsideratë ofrimin e sigurisë gjatë zgjedhjeve në Ukrainë. Të paktën, të ndalojmë, të përmbahemi nga sulmet thellë në territor në ditën e votimit", tha ai.

Ai shtoi më pas se sipas vlerësimeve të ndryshme, në territorin e Rusisë ndodhen rreth 5 deri në 10 milionë qytetarë ukrainas, të cilët kanë të drejtë vote.

"Dhe nëse do të mbahen zgjedhje, atëherë kemi të drejtë të kërkojmë nga ata që do t'i organizojnë ato që ukrainasve që aktualisht banojnë në Rusi t'u jepet e drejta për të votuar në territorin e Federatës Ruse", tha presidenti rus.