Një anije turistike me turistë izraelitë u përball me protestë nga aktivistë propalestinezë në ishullin Rodos të Greqisë, transmeton Anadolu.

Anija turistike me emrin “CROWN IRIS”, që transportonte turistë izraelitë, mbërriti pasdite në portin e Rodosit.

Një grup që dëshironte të shprehte mbështetje për popullin palestinez organizoi një protestë në port me qëllim që të ndalonte zbritjen e turistëve izraelitë nga anija.

Rreth 100 protestues, me flamuj palestinezë në duar dhe me fotografi të fëmijëve të vrarë në Palestinë, zhvilluan demonstratën.

Policia largoi grupin nga porti ndërsa ata thërrisnin slogane si “Liri për Palestinën”. Gjatë përplasjes mes policisë dhe protestuesve, të paktën dy persona u arrestuan.

Ndërkohë, kryetari i Bashkisë së Rodosit, Aleksandros Koliadis, priti anijen në port.

Një grup pasagjerësh në bord shpalosën flamurin e Izraelit.

E njëjta anije kishte shkuar më 22 korrik edhe në ishullin Siros, por për shkak të reagimeve të protestuesve atje, pasagjerët izraelitë nuk kishin mundur të zbrisnin. Anija ishte larguar nga porti pa i zbritur udhëtarët.