Presidenti rus Vladimir Putin ka uruar liderin e Koresë së Veriut, Kim Jong Un, për rizgjedhjen e tij si kryetar i çështjeve shtetërore, njoftoi Kremlini, transmeton Anadolu.

"I dashur shoku Kim Jong-un, ju lutem pranoni urimet e mia të përzemërta për rizgjedhjen tuaj si Kryetar i Çështjeve Shtetërore të Republikës Popullore Demokratike të Koresë", thuhet në deklaratë.

Putini tha se vendimi i deputetëve të Parlamentit të Koresë së Veriut, Asamblesë Supreme Popullore, "dëshmon qartë mbështetjen unanime publike" për kursin e Kim-it.

"Në Rusi, ne e vlerësojmë shumë kontributin tuaj personal në forcimin e lidhjeve miqësore dhe aleate midis vendeve tona. Dhe ne, sigurisht, do të vazhdojmë punën tonë të përbashkët të ngushtë për të zhvilluar më tej partneritetin strategjik gjithëpërfshirës midis Moskës dhe Phenianit", shtoi ai.

Kim u rizgjodh si president i Komisionit të Çështjeve Shtetërore, organi më i lartë drejtues i vendit, gjatë seancës së parë të Asamblesë së 15-të Supreme Popullore, e mbajtur në Phenian të dielën.