Kremlini njoftoi të mërkurën se Presidenti rus, Vladimir Putin, do të presë Presidentin sirian, Ahmed al-Sharaa, në vizitën e tij të parë në Rusi, transmeton Anadolu.

"Udhëheqësit synojnë të diskutojnë gjendjen aktuale dhe perspektivat e ardhshme të lidhjeve Rusi-Siri në politikë, tregti dhe ekonomi, si dhe çështjet kulturore dhe humanitare, si dhe zhvillimet e fundit në Lindjen e Mesme", tha Kremlini në një deklaratë.

Më parë, Agjencia Arabe e Lajmeve Siriane (SANA) konfirmoi vizitën dhe tha se vizita e presidentit Al-Sharaa synon riorganizimin e marrëdhënieve dypalëshe dhe forcimin e bashkëpunimit politik dhe ekonomik.

Gjatë vizitës, Al-Sharaa do të takohet gjithashtu me anëtarë të komunitetit sirian në Rusi.

Të hënën, gjatë një takimi me gazetarë nga vendet arabe, ministri i Jashtëm rus, Sergey Lavrov, tha se Siria dëshiron të mbajë bazat ushtarake ruse në vend, por mund t'i ripërdorë ato për detyra të ndryshme në mes të realiteteve të reja, sipas agjencisë shtetërore të lajmeve të Rusisë Tass.

Në shkurt, Putin foli me homologun Al-Sharaa në telefon, duke riafirmuar mbështetjen e Rusisë për unitetin, sovranitetin dhe stabilitetin e Sirisë, dhe duke shprehur gatishmërinë për të shqyrtuar marrëveshjet e nënshkruara me ish-regjimin e Asadit, ndërsa bëri thirrje për heqjen e sanksioneve ekonomike ndaj Sirisë.

Vizita vjen më shumë se një muaj pasi zëvendëskryeministri rus, Alexander Novak vizitoi, Damaskun më 9 shtator, ku diskutoi me zyrtarë të lartë sirianë çështjet, përfshirë bashkëpunimin energjetik dhe ndihmën humanitare.

Bashar al-Assad, i cili sundoi Sirinë për gati 25 vjet, iku në Rusi në fund të vitit 2024, duke i dhënë fund kontrollit dekadash të Partisë Baath në pushtet që filloi në vitin 1963. Një administratë e re kalimtare e udhëhequr nga Al-Sharaa u formua në janar.