Presidenti i Këshillit Evropian shprehu sot shqetësim në lidhje me sulmet ajrore izraelite në kryeqytetin sirian Damask, duke theksuar nevojën për respektim të sovranitetit dhe integritetit territorial të Sirisë, transmeton Anadolu.

“Shumë i shqetësuar nga sulmet izraelite në Damask sot. Sovraniteti dhe integriteti territorial i Sirisë duhet të respektohen”, shkroi Antonio Costa në X.

Ai gjithashtu bëri thirrje për qetësi mes tensioneve në rritje: “U bëj thirrje të gjitha palëve të përmbahen nga dhuna dhe të ulin tensionet”.

Izraeli rinisi sot sulmet e tij ajrore në Suwayda, në Sirinë jugore, në shkeljen e fundit të sovranitetit të vendit, duke pretenduar se po mbron komunitetin druz të Sirisë.

Sulmet erdhën ndërsa ushtria siriane vendosi forca në provincë për të rivendosur sigurinë dhe për të mbrojtur civilët dhe pronën e tyre, pas përleshjeve midis grupeve të armatosura druze dhe beduine që lanë të paktën 30 të vdekur.

Të paktën një person u vra dhe 18 të tjerë u plagosën sot pasi Izraeli kreu sulme ajrore në kryeqytetin sirian Damask, sipas Ministrisë së Shëndetësisë së vendit.

Agjencia shtetërore e lajmeve SANA tha se avionët luftarakë kryen sulme në Kompleksin e Shtabit të Përgjithshëm dhe Pallatin Presidencial, të njohur si Qasr al-Shaab, në kryeqytet.