Presidenti gjerman Frank-Walter Steinmeier kritikoi sot ashpër tërheqjen e presidentit të SHBA-së, Donald Trump nga marrëveshja bërthamore dhe nisjen e një lufte "të paligjshme" kundër Iranit, transmeton Anadolu.

"Sipas mendimit tim, kjo luftë është shkelje e së drejtës ndërkombëtare", tha ai në një fjalim në Ministrinë e Jashtme gjermane. "Nuk ka dyshim se justifikimi i një sulmi të afërt ndaj SHBA-së është i pavlefshëm, një pikëpamje që ndahet edhe nga shumë njerëz në burokracinë amerikane", shtoi ai.

Steinmeier, i cili më parë ka shërbyer si ministër i jashtëm i vendit, kujtoi marrëveshjen bërthamore të vitit 2015 me Iranin, të cilën ai ndihmoi ta negocionte. Presidenti gjerman tha se vendimi i Trump për të braktisur këtë marrëveshje dhe për të zgjedhur në vend të saj veprime ushtarake është rruga e gabuar për të zgjidhur bllokimin.

"Kjo luftë është një gabim politikisht katastrofik dhe ajo që më frustron më shumë është se kjo është një luftë vërtet e shmangshme dhe e panevojshme nëse qëllimi i saj ishte të ndalonte Iranin në rrugën e tij drejt zhvillimit të bombës bërthamore", tha Steinmeier në kritikën e tij më të fortë publike deri më sot për konfliktin në vazhdim.