Procesi i identifikimit të 40 personave që humbën jetën në zjarrin fatal në një bar gjatë festimeve të Vitit të Ri në qendrën zvicerane të skijimit Crans-Montana po vazhdon, ndërsa shumica e 119 të lënduarve janë identifikuar zyrtarisht, thanë sot autoritetet, transmeton Anadolu.

Komandanti i policisë kantonale në Valais, Frederic Gisler, tha në një konferencë të përbashkët për media se 113 nga të lënduarit janë identifikuar, ndërsa për gjashtë persona të tjerë procesi është ende në vazhdim.

Mes të identifikuarve janë 71 shtetas zviceranë, 14 francezë, 11 italianë, katër serbë, një boshnjak, një belg, një nga Luksemburgu, një polak dhe një portugez, tha ai.

Sipas Gisler, kombësia e 14 të lënduarve të tjerë mbetet e panjohur dhe shifrat mund të ndryshojnë ndërsa puna e identifikimit po përparon.

Presidenti i Këshillit Shtetëror të Valaisit, Mathias Reynard, paralajmëroi se gjendja shëndetësore e shumë të mbijetuarve mbetet kritike.

“Duam të kujtojmë se shumë të lënduar po luftojnë për jetën e tyre. Shumë prej tyre janë në gjendje kritike”, tha Reynard.

Prokurorja e Përgjithshme e Valaisit, Beatrice Pilloud, tha se gjetjet e para sugjerojnë se zjarri u shkaktua nga qirinj xixëllues në shishet e pijeve.

“Çdo gjë tregon se zjarri nisi nga qirinj ndezës ose xixëllonja të vendosura mbi shishet e shampanjës dhe se gjithçka ishte shumë pranë tavanit”, tha ajo, duke e përshkruar atë si një zjarr që u përhap shpejt.

Ajo tha se janë siguruar dhe analizuar video, janë marrë në pyetje disa persona dhe janë bërë vëzhgime në vendngjarje, përfshirë edhe dy menaxherët francezë të barit dhe të mbijetuar. Këto dëshmi kanë ndihmuar në hartimin e listave të personave të pranishëm dhe në sqarimin e organizimit të brendshëm, rinovimeve dhe kapacitetit të lokalit.

Faza e radhës e hetimit do të përqendrohet në punimet e kryera brenda barit, materialet e përdorura, lejet e funksionimit dhe masat e sigurisë, përfshirë shuarësit e zjarrit, rrugët e evakuimit, respektimin e standardeve të sigurisë nga zjarri dhe numrin e personave të pranishëm krahasuar me kapacitetin e lejuar.

“Do të shqyrtohet mundësia e përgjegjësisë penale të individëve”, tha ajo, duke shtuar se, nëse ata janë gjallë, mund të hapen procedura për vepra të lidhura me neglizhencë.

Ajo theksoi se identifikimi mbetet përparësia kryesore “që familjet të mund të fillojnë procesin e zisë”.

Policia tha se po zbatohen protokolle ndërkombëtare të identifikimit, një “proces që kërkon kohë”. Dosje janë hapur në bashkëpunim me disa vende, përfshirë Zvicrën, Belgjikën, Francën, Italinë, Portugalinë, si dhe Filipinet, Kongon, Rumaninë, Serbinë dhe Turqinë, për të mundësuar identifikime zyrtare sa më shpejt.

Reynard tha se më 9 janar në Crans-Montana do të mbahet një ceremoni kombëtare zie.