Pjesë të mëdha të një rakete iraniane ranë pranë një fshati në Damask, Siri, pasi u interceptuan nga ushtria izraelite, raportuan mediat siriane, transmeton Anadolu.

Televizioni Alikhbaria Syria tha se copëzat ranë në afërsi të fshatit Ma'as pasi raketa u interceptua.

Kanali shtoi se fragmentet e raketës që ranë nuk shkaktuan dëme apo viktima.

Ibrahim Al-Mousa, një banor i fshatit të afërt Al-Mushaqaq, i tha kanalit se interceptimi i raketës shkaktoi frikë dhe panik te banorët, veçanërisht te fëmijët.

"Nëse copëzat e raketës do të kishin rënë mbi një shtëpi, mund të kishin shkaktuar dëme", tha ai.

Incidente të ngjashme janë raportuar ditët e fundit në jug të Sirisë, veçanërisht në provincat Daraa dhe Quneitra, pasi copëza nga raketa të interceptuara ranë mes sulmeve të vazhdueshme të SHBA-së dhe Izraelit ndaj Iranit dhe përgjigjes ushtarake të Teheranit, duke rritur shqetësimet te civilët.

Që nga nisja e sulmeve të përbashkëta të Izraelit dhe SHBA-së ndaj Iranit më 28 shkurt, ku deri më tani janë vrarë më shumë se 1.200 persona, përfshirë edhe Udhëheqësin Suprem të atëhershëm Ajatollah Ali Khamenei, armiqësitë janë përshkallëzuar.

Irani u kundërpërgjigj me sulme me dronë dhe raketa që shënjestruan Izraelin, Jordaninë, Irakun dhe vendet e Gjirit që strehojnë asete ushtarake amerikane.