Parlamenti libian ka denoncuar thirrjen e Greqisë për të anuluar një memorandum mirëkuptimi të nënshkruar midis Tripolit dhe Ankarasë në vitin 2019 mbi përcaktimin e kufirit detar, duke e përshkruar atë si "një shkelje të qartë të sovranitetit kombëtar", transmeton Anadolu.

Të dielën, gjatë takimit të tij në Athinë me homologun e tij libian Aguila Saleh, Kryetari i Parlamentit të Greqisë, Nikitas Kaklamanis, tha se marrëveshja detare Turqi-Libi e vitit 2019 duhet të revokohet.

"Ne i ndoqëm me habi dhe mosmiratim deklaratat e përsëritura të bëra nga zyrtarët grekë, të fundit, prej të cilave i atribuoheshin Kryetarit të Parlamentit Grek që përmbanin thirrje të qarta për të ndërhyrë në punët e brendshme të Libisë", tha Misbah Ouhida, nënkryetari i dytë i parlamentit libian, në një deklaratë.

Ouhida i quajti komentet e zyrtarit grek "një shkelje të qartë të sovranitetit kombëtar".

Ai konfirmoi respektin e tij për "parimet e fqinjësisë së mirë dhe marrëdhëniet dypalëshe të bazuara në respekt të ndërsjellë".

"Libia është një shtet plotësisht sovran dhe vetëm ajo i di interesat e saj supreme dhe si t’i mbrojë ato", tha ai, duke hedhur poshtë "çdo formë ndërhyrjeje në vendimet sovrane të Libisë ose çdo përpjekje nga një palë e jashtme për t’i imponuar asaj direktiva politike".

Marrëveshja ka të bëjë me përcaktimin e kufijve detarë midis Libisë dhe Turqisë. Greqia pretendon se marrëveshja përbën një "sulm" ndaj zonës së saj ekskluzive ekonomike.

Lidhur me marrëveshjen me Turqinë, Ouhida tha se marrëveshjet e lidhura nga shteti "janë vendime sovrane të qeverisura nga ligjet dhe normat ndërkombëtare, dhe asnjë vend nuk ka të drejtë t’i diktojë Libisë nëse do t’i ratifikojë, braktisë apo anulojë ato".

Ai i kërkoi "palës greke të ushtrojë vetëpërmbajtje, të respektojë sovranitetin e Libisë dhe të ndalojë përpjekjet për të ndërhyrë në punët e brendshme të Libisë".