ANKARA (AA) - Ligjvënësit e opozitës në Zelandën e Re kanë kërkuar dëbimin e të dërguarit izraelit nga vendi dhe vendosjen e sanksioneve ekonomike ndaj Tel Avivit, transmeton Anadolu.

Thirrja për dëbimin e të dërguarit izraelit erdhi një ditë pasi Zelanda e Re u bashkua me aleatët e saj në vendosjen e sanksioneve ndaj dy anëtarëve të ekstremit të djathtë të kabinetit të qeverisë izraelite.

Siç raporton Radio Zelanda e Re (RNZ), bashkëkryetarja e "Të Gjelbërve", Chloe Swarbrick, i përshkroi veprimet izraelite në Gaza si "gjenocid" dhe kërkoi nga koalicioni qeverisës të mbështesë projektligjin e saj në parlament dhe të vendosë sanksione ekonomike ndaj Izraelit.

"Si mund ta quani ndryshe në fund të fundit. Të paktën, ambasadori izraelit duhet të dëbohet, shtetësia palestineze duhet të njihet dhe duhet të futet një kategori e veçantë vizash për palestinezët", tha ajo.

Swarbrick i quajti sanksionet e fundit të qeverisë kundër dy ministrave izraelitë "simbolike" dhe u ankua se u deshën pothuajse dy vite për të arritur në këtë pikë.

Dje, Australia, Zelanda e Re, Kanadaja, Norvegjia dhe Britania e Madhe sanksionuan dy ministrat izraelitë, respektivisht ministrin e Sigurisë Kombëtare, Itamar Ben-Gvir dhe ministrin e Financave, Bezalel Smotrich, për "nxitje të dhunës kundër palestinezëve në Bregun Perëndimor".

Debbie Ngarewa-Packer, bashkëkryetare e partisë "Te Pati Maori", iu referua sanksioneve të fundit si "hipokrizi politike".

"Kur bëhet fjalë për luftën, të drejtat e njeriut dhe shkallën e dhunës dhe gjenocidit që po shohim, Palestina është kombi i vet i pavarur. Pse kjo qeveri po sanksionon vetëm dy ministra. Ata duhet të sanksionojnë të gjithë Izraelin", tha Ngarewa-Packer.

Ajo kërkoi nga qeveria e Zelandës së Re të pezullojë të gjitha lidhjet diplomatike me Izraelin, të vendosë sanksione ndaj kompanive dhe zyrtarëve ushtarakë izraelitë si dhe të ofrojë mbështetje shtesë për gjykatat ndërkombëtare.

"Nuk është luftë, është një shfarosje. Është një shfarosje absolute e qenieve njerëzore. Ne jemi atje jashtë duke mbështetur ata aleatë që po ndihmojnë në armatimin e Izraelit dhe në rrafshimin dhe pushtimin e vazhdueshëm mizor të një kombi dhe nuk është asgjë nga ajo që mendoja se do të dëshmoja në ditët e mia të jetës", tha ajo.

Kryeministri i Zelandës së Re, Christopher Luxon mbrojti vendimin e vendit të tij për t'u bashkuar me vendet e tjera në vendosjen e sanksioneve ndaj ministrave izraelitë, duke theksuar se vendi i tij "nuk do të tërhiqet".

"Ne kemi një pikëpamje se kjo është rruga e duhur e veprimit për ne", tha ai.