Omani po punon për të siguruar "rregullime të kalimit të sigurt" përmes Ngushticës së Hormuzit ndërsa konflikti në rajon intensifikohet, tha ministri i Jashtëm Badr Albusaidi, transmeton Anadolu.

Në deklarata të publikuara në platformën sociale të kompanisë amerikane X, Albusaidi tha se lufta në vazhdim tashmë po shkakton ndërprerje të gjera ekonomike, duke paralajmëruar se situata mund të përkeqësohet më tej nëse luftimet vazhdojnë.

"Pavarësisht nga pikëpamja juaj për Iranin, kjo luftë nuk është bërë nga ata" tha ai, duke shtuar se ajo "tashmë po shkakton probleme të gjera ekonomike dhe kam frikë se do të përkeqësohen shumë më tepër nëse lufta vazhdon".

Ai shtoi se Omani "po punon intensivisht për të vendosur rregullime të kalimit të sigurt për Ngushticën e Hormuzit" një korridor detar jetik për furnizimet globale të energjisë.

Ngushtica e Hormuzit është ndërprerë në mënyrë efektive që nga fillimi i marsit. Rreth 20 milionë fuçi nafte kalojnë zakonisht nëpër të çdo ditë dhe ndërprerja e saj ka rritur kostot e transportit detar dhe ka shtyrë çmimet globale të naftës në rritje.

Përshkallëzimi rajonal ka vazhduar të intensifikohet që nga sulmet e përbashkëta të SHBA-së dhe Izraelit ndaj Iranit më 28 shkurt, duke shkaktuar deri tani mbi 1.340 viktima, përfshirë edhe udhëheqësin e atëhershëm suprem Ali Khamenei.

Irani ka kundërpërgjigjur me sulme me dronë dhe raketa që kanë shënjestruar Izraelin, si dhe Jordaninë, Irakun dhe vendet e Gjirit që strehojnë asete ushtarake amerikane, duke shkaktuar viktima dhe dëme në infrastrukturë si dhe duke ndërprerë tregjet globale dhe aviacionin.