Omani tha sot se një cisternë nafte u shënjestrua në veriperëndim të portit Sultan Qaboos dhe ekuipazhi i saj u evakuua pas shpërthimit të një zjarri, transmeton Anadolu.

Cisterna e naftës MKD VYOM me flamur të Ishujve Marshall "u sulmua nga një anije e drejtuar nga distanca" rreth 52 milje detare larg bregdetit të Guvernatorit Muscat, tha Qendra e Sigurisë Detare në kompaninë amerikane të mediave sociale X.

Cisterna mbante rreth 59.463 tonë metrikë ngarkesë, deklaroi Qendra duke shtuar se sulmi shkaktoi zjarr dhe shpërthim në dhomën kryesore të motorëve, duke vrarë një anëtar të ekuipazhit me kombësi indiane.

"Në koordinim me Qendrën e Sigurisë Detare, ekuipazhi i cisternës prej 21 personash, përfshirë 16 indianë, 4 bangladeshas dhe 1 ukrainas u evakuua nga anija tregtare (MV SAND), që mban flamurin e Panamasë", vuri në dukje Qendra.

Ndërkohë, një anije nga Marina Mbretërore e Omanit po mbikëqyr gjendjen e cisternës së dëmtuar dhe po lëshon paralajmërime sigurie për anijet e tjera që lundrojnë në zonë, shtoi ajo.

Ky zhvillim erdhi ndërsa SHBA-ja dhe Izraeli nisën sulm në shkallë të gjerë ndaj Iranit të shtunën, duke vrarë disa udhëheqës të lartë iranianë, përfshirë udhëheqësin suprem Ajatollah Ali Khamenei.

Në përgjigje, Teherani është hakmarrë me sulme me dronë dhe raketa që synojnë Izraelin si dhe vendet e Gjirit, të cilat janë shtëpi të aseteve amerikane.