Kryeministri izraelit, Benjamin Netanyahu, menjëherë pas mbërritjes në Washington për bisedime me Presidentin Donald Trump u takua të martën me zyrtarë të lartë amerikanë të përfshirë në negociatat me Iranin, transmeton Anadolu.

Netanyahu zhvilloi diskutime me të dërguarin special Steve Witkoff dhe Jared Kushner, dhëndrin e Trumpit dhe këshilltarin jozyrtar, duke u përqendruar në negociatat me Teheranin pas bisedimeve të mbajtura javën e kaluar në Oman, tha gazetari i Axios, Barak Ravid, në një postim në platformën e kompanisë amerikane të mediave sociale X.

Takimi thuhet se u zhvillua në Blair House, rezidencën zyrtare të mysafirëve të presidentit amerikan, disa orë pasi Netanyahu mbërriti për vizitën e tij të gjashtë zyrtare në SHBA që kur Trump u kthye në Shtëpinë e Bardhë vitin e kaluar.

Bisedimet midis Trumpit dhe Netanyahut në Shtëpinë e Bardhë të mërkurën pritet të përqendrohen në raundin tjetër të negociatave mbi programin bërthamor midis Iranit dhe SHBA-së, pasi raundi i parë u mbajt në Oman javën e kaluar.

Këto diskutime në Muscat pasuan një pezullim gati tetëmujor pas sulmeve të Trumpit ndaj objekteve bërthamore të Iranit në qershor.

Midis Washingtonit dhe Teheranit, tensionet janë përshkallëzuar pasi janë nxitur nga një grumbullim ushtarak amerikan në Gjirin Persik dhe kërcënimet e përsëritura për veprime ushtarake nga Trump.