Negociatat indirekte midis Hamasit dhe Izraelit për një armëpushim në Gaza dhe një marrëveshje për shkëmbim të të burgosurve rifilluan të martën në Egjipt, transmeton Anadolu.

E përditshmja egjiptiane "AlMasry Alyum" raportoi se negociatorët e Hamasit dhe Izraelit filluan ditën e dytë të negociatave në qytetin Sharm el-Sheikh, në Detin e Kuq.

Zëdhënësi i Ministrisë së Jashtme të Katarit, Majed Al-Ansari, konfirmoi rifillimin e bisedimeve, duke thënë se shumë detaje në planin e Presidentit të SHBA-së, Donald Trump, për Gazën kanë nevojë për diskutim dhe negociata midis dy palëve.

Duke folur në një konferencë për media në Doha, Ansari tha se negociatorët e Hamasit dhe Izraelit zhvilluan bisedime katër-orëshe të hënën për të hequr pengesat për një armëpushim në Gaza.