Muzeu i Luvrit në Paris do të mbetet i mbyllur edhe sot, pasi stafi votoi për të vazhduar grevën që nisi në fillim të kësaj jave, njoftuan sindikatat, duke përmendur si arsye përkeqësimin e kushteve të punës dhe mungesën e burimeve pas grabitjes së bujshme rreth dy muaj më parë, transmeton Anadolu.

Në një mbledhje të asamblesë së përgjithshme, punonjësit vendosën të zgjasin grevën, sipas sindikatave CGT dhe CFDT, raportoi BFM TV. Greva nisi të hënën pasi rreth 400 punonjës votuan njëzëri për të protestuar kundër asaj që e përshkruajnë si mungesë kronike të stafit, përkeqësim të gjendjes së ndërtesës historike dhe presione buxhetore.

Muzeu më i vizituar në botë ishte tashmë i mbyllur të hënën për shkak të grevës dhe sërish të martën, që është dita e rregullt javore e mbylljes së tij. Përfaqësuesit e sindikatave thanë se zhgënjimi i stafit është shtuar nga një sërë incidentesh që nga grabitja e 19 tetorit, përfshirë mbylljen e përkohshme të një galerie dhe dëmtimin e librave të vjetër si pasojë e një rrjedhjeje uji.

Pas një takimi krize me sindikatat në Ministrinë e Kulturës, qeveria propozoi disa masa, përfshirë anulimin e një shkurtimi të planifikuar prej 5.7 milionë eurosh për vitin 2026, hapjen e vendeve të reja të punës për pritjen e vizitorëve dhe rolet e monitorimit si dhe rritjen e kompensimit.

Megjithatë, sindikatat kërkojnë që rritja e pagave të bëhet e përhershme.

Mosmarrëveshja e punës ka rikthyer vëmendjen mbi menaxhimin e sigurisë së muzeut. Presidentja e Luvrit, Laurence des Cars, pritet të përballet me pyetje të tjera nga Komisioni i Kulturës i Senatit më vonë sot ndërsa ligjvënësit kërkojnë sqarime mbi dështimet e sigurisë të nxjerra në pah nga grabitja.

Des Cars ka pranuar më herët para Senatit një "dështim" në siguri, por ka thënë se janë ndërmarrë hapa për të përshpejtuar një plan të përgjithshëm sigurie që ishte vonuar prej kohësh.