Ekipi i Agjencisë Ndërkombëtare për Energji Bërthamore (IAEA) në Termocentralin Bërthamor të Zaporizhzhias (ZNPP) në Ukrainë ka dëgjuar shpërthime dhe ka vërejtur tym që vinte nga një vend në afërsi, tha mbikëqyrësi bërthamor i OKB-së, transmeton Anadolu.

“Ekipi në Termocentralin Bërthamor të Zaporizhzhias dëgjoi shpërthime dhe pa tym që vinte nga një vend aty pranë, ku centrali tha se një nga objektet ndihmëse të tij u sulmua sot (të shtunën)”, thuhet në një deklaratë të IAEA-s, duke cituar kreun e agjencisë, Rafael Grossi.

Ekipi u njoftua nga zyrtarët e ZNPP-së se objekti, i vendosur 1.200 metra nga perimetri i centralit, u godit nga bombardime dhe sulme me dron që nisën në orën 9:00 të mëngjesit me kohën lokale (06:00 GMT), duke përkuar me kohën kur ekipi dëgjoi aktivitetin ushtarak në afërsi, thuhet në deklaratë.

Tymi nga zona ishte ende i dukshëm më vonë pasdite, u theksua më tej.

Incidenti është më i fundit në një sërë ngjarjesh gjatë javëve dhe muajve të fundit që nënvizojnë rreziqet për sigurinë bërthamore në mes të konfliktit ushtarak pranë ZNPP-së, tha agjencia.

“Çdo sulm në afërsi të një termocentrali bërthamor – pavarësisht nga objektivi i synuar – paraqet rreziqe të mundshme edhe për sigurinë bërthamore dhe duhet të shmanget. Edhe një herë, bëj thirrje për përmbajtje maksimale ushtarake pranë objekteve bërthamore për të parandaluar rrezikun e vazhdueshëm të një aksidenti bërthamor”, ka thënë Grossi.