Përpara bisedimeve me SHBA-në në Oman, ministri i Jashtëm i Iranit deklaroi sot se Teherani po angazhohet në diplomaci “me mirëbesim”, duke theksuar se “angazhimet duhet të respektohen”, transmeton Anadolu.

“Irani hyn në diplomaci me sy hapur dhe me një kujtesë të qëndrueshme të vitit të kaluar. Ne angazhohemi me mirëbesim dhe qëndrojmë të palëkundur në të drejtat tona”, shkroi Abbas Araghchi në një postim në rrjetin social amerikan X.

“Angazhimet duhet të respektohen”, tha ai, duke theksuar se barazia, respekti i ndërsjellë dhe interesat e përbashkëta janë “të domosdoshme dhe shtyllat e një marrëveshjeje të qëndrueshme”.

Washingtoni dhe Teherani pritet të zhvillojnë bisedime mbi çështjen bërthamore sot në Oman. Anën amerikane do ta përfaqësojnë dhëndri i presidentit amerikan Donald Trump, Jared Kushner, dhe i dërguari special i SHBA-së, Steve Witkoff.

Irani do të përfaqësohet nga një delegacion diplomatik i kryesuar nga Araghchi. Ministri i Jashtëm iranian ka mbërritur në kryeqytetin e Omanit, Maskat, për takimin, raportoi agjencia gjysmëzyrtare iraniane Tasnim.

Bisedimet ishin vënë në dyshim më herët gjatë kësaj jave, por një zyrtar i Shtëpisë së Bardhë konfirmoi për Anadolu se ato do të zhvillohen.

Bisedimet e planifikuara vijnë në një kohë tensionesh në rritje mes Washingtonit dhe Teheranit, të nxitura nga grumbullimi ushtarak amerikan në Gjirin Persik dhe kërcënimet e përsëritura për veprime ushtarake nga Trump.

Ditët e fundit, disa vende kanë ndërhyrë dhe kanë ofruar ndërmjetësim mes Teheranit dhe Washingtonit për të ulur tensionet, me Turqinë që ka luajtur një rol veçanërisht aktiv.

SHBA-ja dhe aleati i saj Izraeli e akuzojnë Iranin se synon prodhimin e armëve bërthamore, ndërsa Teherani thotë se programi i tij bërthamor është i destinuar për qëllime paqësore, përfshirë prodhimin e energjisë elektrike.