Ministri i Jashtëm gjerman, Johann Wadephul, paralajmëroi të premten kundër distancimit të plotë të Evropës nga Shtetet e Bashkuara të Amerikës(SHBA), duke thënë se një sovranitet më i madh nuk duhet të nënkuptojë ndërprerjen e lidhjeve transatlantike, transmeton Anadolu.

Evropa duhet të bëjë përpjekje më të forta për t'u bërë më e pavarur dhe sovrane, por jo e pavarur nga SHBA-ja, tha Wadephul për transmetuesin publik ZDF.

"Kjo do të ishte një ndarje, të cilën askush nuk e dëshiron dhe që është gjithashtu e panevojshme," tha ai.

Wadephul hodhi poshtë formulimin e debatit si një zgjedhje midis Evropës dhe SHBA-së.

"Le të bëjmë një debat në të cilin të themi sinqerisht se çfarë mund dhe duhet të bëjmë më shumë në Evropë dhe nga ana tjetër, çfarë kemi në SHBA. Kjo është një aleancë e besueshme", tha ai.

Ai theksoi se SHBA-ja mbetet plotësisht e integruar në NATO dhe luajnë një rol vendimtar në mbrojtjen e Evropës.

"Pa SHBA-në, ne nuk do të kishim aftësi të mjaftueshme mbrojtëse në Evropë, as bërthamore as konvencionale, as në aspektin e informacionit dhe punës së inteligjencës. Kjo duhet thënë me shumë maturi," tha ai.

Komentet e ministrit Wadephul vijnë pas vërejtjeve të fundit të kancelarit Friedrich Merz në Konferencën e 62-të të Sigurisë në Mynih, i cili bëri thirrje për një marrëdhënie të ripërtërirë transatlantike me një shtyllë evropiane të fortë dhe kryesisht të pavarur.

Merz ka paralajmëruar vazhdimisht se Shtetet e Bashkuara të Amerikës po largohen nga një rend ndërkombëtar i bazuar në rregulla drejt një politike të drejtuar nga fuqia dhe interesat dhe i ka kërkuar Evropës të afirmojë veten.