Kancelari gjerman, Friedrich Merz, të enjten i bëri thirrje Iranit të hyjë për negociata serioze për të ndaluar programin e tij bërthamor, duke paralajmëruar se potenciali për përshkallëzim ushtarak në Lindjen e Mesme është i madh, transmeton Anadolu.

Duke folur me gazetarët në Doha të Katarit, Merz tha se zhvillimet e fundit mbi Iranin janë ndër çështjet kryesore që ai planifikon të trajtojë gjatë turneut të tij në Gjirin Persik, mes paralajmërimeve të SHBA-së për ndërhyrje të mundshme ushtarake.

"Në të gjitha bisedat e mia dje (në Arabinë Saudite) dhe gjithashtu këtu (në Katar) sot, është shprehur shqetësim i madh për një përshkallëzim të mëtejshëm të konfliktit me Iranin", tha udhëheqësi konservator.

"Do të doja gjithashtu të shfrytëzoja këtë mundësi për t'i bërë thirrje edhe një herë udhëheqjes iraniane të hyjë në negociata serioze, për t'i dhënë fund agresionit, për t'i dhënë fund programit bërthamor, siç është rënë dakord ndërkombëtarisht", theksoi ai.

Merz tha se do të ishte një zhvillim pozitiv nëse bisedime të tilla me Iranin mund të arriheshin në ditët në vijim me pjesëmarrjen e përfaqësuesve të SHBA-së.

"Sidoqoftë, dua të bëj gjithçka që mundem për të kontribuar në de-përshkallëzim", tha ai, duke shtuar se Berlini është gati të punojë me partnerët rajonalë për të siguruar stabilitet.