Maroku njoftoi sot rihapjen e ambasadës së saj në Siri pas një mbylljeje 13-vjeçare, transmeton Anadolu.

Ambasada rifilloi operacionet e saj në Damask të dielën e kaluar, njoftoi agjencia zyrtare marokene e lajmeve.

Ambasada ka vënë në dukje se është rihapur përkohësisht në vendndodhjen e saj të mëparshme, në pritje të përfundimit të procedurave administrative dhe përgatitjeve për t’u zhvendosur në një ambient të ri “që i përshtatet më mirë momentumit të ripërtërirë në marrëdhëniet marokeno-siriane”, shtoi ajo.

Në maj, Maroku vendosi të rihapë ambasadën e saj në kryeqytetin sirian.

Bashar al-Asad, udhëheqësi i Sirisë për gati 25 vjet, iku në Rusi në fund të vitit 2024, duke i dhënë fund regjimit të Partisë Baath, e cila kishte qenë në pushtet që nga viti 1963.

Një administratë e re kalimtare e udhëhequr nga presidenti Ahmad al-Sharaa u formua në Siri në janar.