Presidenti francez Emmanuel Macron vlerësoi sot "parashikueshmërinë" e Evropës ndërsa iu përgjigj kritikave nga presidenti i SHBA-së, Donald Trump lidhur me qëndrimin e Francës ndaj luftës me Iranin, transmeton Anadolu.

Duke folur gjatë një vizite në Tokio, Macron tha se qëndrueshmëria në politikë është një aset në kohë pasigurie globale.

"Parashikueshmëria ka vlerë dhe ne e kemi demonstruar atë gjatë viteve të kaluara, madje edhe në javët e kaluara. Ne jemi aty ku e dini se do të jemi", tha ai ndërsa iu drejtua udhëheqësve të biznesit dhe investitorëve duke thënë se "Kjo nuk është keq në këto kohë, më besoni".

Ai e krahasoi qasjen e Evropës me atë që e përshkroi si vendimmarrje më të paqëndrueshme diku tjetër, duke paralajmëruar se ndryshimet e shpejta mund të krijojnë pasiguri.

Trump të martën kritikoi Francën në platformën e tij "Truth Social" duke e quajtur atë "Jo shumë ndihmuese" në konfliktin me Iranin dhe duke pretenduar se kishte bllokuar avionë ushtarakë që shkonin drejt Izraelit.

Ky shkëmbim vjen mes tensioneve në rritje që përfshijnë Iranin. Qindra persona janë raportuar të vrarë në sulmet e SHBA-së dhe Izraelit ndërsa Teherani është kundërpërgjigjur me sulme me dronë dhe raketa që kanë shënjestruar Izraelin si dhe Jordaninë, Irakun dhe vendet e Gjirit që strehojnë asete ushtarake amerikane, duke shkaktuar viktima, dëme në infrastrukturë dhe ndërprerje të tregjeve globale dhe aviacionit.