Presidenti i Francës, Emmanuel Macron riafirmoi thirrjen për zgjidhje paqësore me dy shtete ndërsa pritet të deklarojë njohjen e shtetit të Palestinës në Asamblenë e Përgjithshme të OKB-së në New York këtë javë, transmeton Anadolu.

"Ajo që dëshiron Franca janë dy shtete që jetojnë në paqe krah për krah: një shtet i Izraelit që njeh një shtet të Palestinës, një shtet i Palestinës që njeh një shtet të Izraelit", tha Macron në një video që publikoi të dielën në kompaninë amerikane të mediave sociale X.

Ai vuri në dukje "dhimbjen", "vuajtjen" dhe "shqetësimin" e të gjithë njerëzve në Rripin e Gazës dhe atyre që jetojnë "nën bombardimet pa qasje në ndihmë humanitare".

"Thellë-thellë, të gjitha jetët janë të barabarta. Dhe pas gjithë kësaj, ne kemi vjedhur jetë, kemi marrë jetë, njerëz që vuajnë. Dhe ajo që duam, ajo që dëshiron Franca, është paqja", tha Macron. Ai riafirmoi se njohja e tyre e një shteti të Palestinës është "fillimi i një rruge", duke kujtuar praninë e kushteve dhe kërkesave për palët e përfshira.

Të dielën, në një intervistë për CBS News, Macron tha se lirimi i pengjeve izraelite ishte "kusht i qartë" përpara se të hapnin ambasadë në Palestinë. Ai shprehu mospajtimin e tij me përfundimin e fundit nga hetuesit e OKB-së se Izraeli po kryen gjenocid në Rripin e Gazës.

"Ne nuk e kualifikojmë si gjenocid atë që po ndodh sepse nuk është një deklaratë politike. Kjo është detyrë e gjyqtarëve ose historianëve të kualifikojnë një gjenocid me një sërë provash dhe një jurisprudence të qartë dhe elementë të qartë", tha Macron.

Të dielën, Britania e Madhe, Kanadaja, Australia dhe Portugalia deklaruan njohjen e Palestinës, duke e çuar numrin e përgjithshëm të shteteve anëtare të OKB-së që e kanë ndërmarrë këtë hap në 153 nga 193.

Njëmbëdhjetë vende të tjera, përfshirë Maltën, Luksemburgun, Francën, Belgjikën dhe Armeninë kanë deklaruar plane për të zgjeruar njohjen gjatë sesionit të 80-të të Asamblesë së Përgjithshme të OKB-së këtë muaj në New York, ku liderët botërorë do të mblidhen për debatin e përgjithshëm.