Të paktën 19 persona kanë vdekur në shtetin jugor indian Kerala në vitin 2025 nga meningoencefaliti amebik primar (PAM), një infeksion i rëndë i trurit i njohur edhe si "ameba që ha trurin", konfirmoi sot ministrja e Shëndetësisë, Veena George, raporton Anadolu.

Ajo tha se gjithsej 69 raste janë raportuar këtë vit.

Shteti ka lëshuar një alarm përderisa sëmundja po përhapet, raportoi transmetuesi shtetëror "DD News".

Infeksioni i rrallë shkaktohet nga "Naegleria fowleri", i cili është gjetur në pishina, parqe ujore dhe vende të tjera rekreative të mirëmbajtura dobët, sipas Qendrave Amerikane për Kontrollin dhe Parandalimin e Sëmundjeve (CDC).

Shpesh quhet "ameba që ha trurin" sepse mund të infektojë trurin dhe të shkatërrojë indet e trurit, tha CDC në faqen e saj të internetit.

Nuk është hera e parë që shteti ka parë raste të infeksionit. Rasti i parë u raportua në vitin 2016.

Departamenti i Shëndetësisë i Keralës tha se "raste sporadike të PAM janë raportuar nga shumë pjesë të Keralës në dekadën e fundit".