LONDËR (AA) - Një hulumtim i ri ka zbuluar se fëmijët me ngjyrë të ndaluar nga policia në Londër kanë 15 për qind më shumë gjasa sesa fëmijët e bardhë të akuzohen dhe të hyjnë në sistemin e drejtësisë penale për vepra të ngjashme penale, transmeton Anadolu.

Studimi nga Fondi i Fondacionit të të Rinjve (YEF) dhe i kryer në partneritet me Ekipin e Vështrimeve të Sjelljes dhe Policinë Metropolitane, analizoi të dhëna që shtrihen në një periudhë shtatëvjeçare dhe që përfshijnë gati 265 mijë fëmijë dhe të rinj që ranë në kontakt me policinë në Londër midis viteve 2015 dhe 2022.

Fëmijët me ngjyrë kishin shkallë dukshëm më të lartë të kontaktit me policinë sesa bashkëmoshatarët e tyre të bardhë, duke përbërë 44.3 për qind të rasteve pavarësisht se përfaqësonin vetëm 24.7 për qind të popullsisë lokale gjatë periudhës së hulumtimit.

Ndihmësdrejtoresha e Policisë dhe Drejtësisë Rinore në YEF, Dr. Stevie-Jade Hardy tha: "Kur bëhet mirë dhe në rrethana të përshtatshme, devijimi i fëmijëve nga sistemi i drejtësisë penale mund të zvogëlojë rikthimin e veprave penale".

"Por, ndryshimet e mëdha në mënyrën se si zbatohet kjo do të thotë që jo çdo të riu i jepet mundësia të përfitojë nga kjo qasje. Ne duhet të sigurohemi që ajo të ofrohet në mënyrë efektive, të vazhdueshme dhe të barabartë për të mbrojtur fëmijët nga dhuna", tha Hardy.