Lituania po përballet me një rënie të thellë demografike, me të dhënat e reja që tregojnë se numri i foshnjave të lindura çdo vit është ulur me gati një të tretën gjatë një dekade, raportoi sot media vendase, transmeton Anadolu.

Sipas shifrave të transmetuara nga televizioni kombëtar LRT, më shumë se 30.000 fëmijë lindnin në vit në Lituani një dekadë më parë, ndërsa vitin e kaluar janë regjistruar gati 11.000 lindje më pak.

Rënia ka alarmuar politikëbërësit, të cilët thonë se nevojiten masa urgjente për të stabilizuar popullsinë dhe për të shmangur presionin e mëtejshëm ndaj shërbimeve publike.

Në rrethin Rokiskis, përmasa e krizës është tronditëse: vdekjet i kanë tejkaluar lindjet me raport pesë me një muajin e kaluar; shkalla e martesave dhe divorceve është pothuajse e njëjtë, një prirje që banorët e lidhin me vështirësitë financiare, pagat e ulëta dhe zbrazjen e shpejtë të zonave rurale.

"Të rinjtë largohen të gjithë në qytete dhe këtu mbeten vetëm gjyshërit", ka thënë një banor për LRT.

Që nga shpallja e pavarësisë, popullsia e përgjithshme e Lituanisë është zvogëluar me gati 20 për qind.

Sondazhet e nismës "Auginu Lietuva" (Po e rris Lituaninë) tregojnë se më shumë se gjysma e lituanëve e shohin negativisht situatën demografike.

Themeluesja e grupit, Asta Radzeviciene, ka thënë se shumë familje shtyjnë lindjen e fëmijëve për shkak të pasigurisë financiare, preferencave të stilit të jetesës dhe madje edhe shqetësimeve për sigurinë, duke theksuar se 10 për qind e të anketuarve përmendin frikën nga lufta si faktor.

Ministrja e Shëndetësisë, Marija Jakubauskiene, ka paralajmëruar se pasojat tashmë ndihen në tregun e punës, veçanërisht në sektorin e shëndetësisë.

"Plakja e shpejtë ndihet në gjithë shoqërinë. Rreth gjysma e infermiereve janë tashmë mbi moshën 55-vjeçare", ka thënë ajo.

Ministrja e Sigurimeve Shoqërore dhe Punës, Jurate Zailskiene, ka njoftuar se rregullat për kompensimin e kujdesit për fëmijët do të zgjerohen për të mbështetur familjet ku njëri prind punon dhe tjetri është në studime ose trajnim profesional.

Radzeviciene ka kërkuar më shumë mbështetje për foshnjat e lindura para kohe dhe zbatimin e standardeve evropiane të kujdesit neonatal, në mënyrë që shërbimet thelbësore të mbeten të aksesueshme në rajonet ku spitalet po mbyllen.