Ish-shefja e politikës së jashtme të BE-së, Federica Mogherini u lirua pasi u njoftua zyrtarisht për akuzat në një hetim të vazhdueshëm për mashtrim të dyshuar në lidhje me trajnimin e financuar nga BE-ja për diplomatë të rinj, tha sot Zyra e Prokurorit Publik Evropian (EPPO), transmeton Anadolu.

Me kërkesë të EPPO-së në Bruksel, Mogherini së bashku me një anëtar të lartë të stafit të Kolegjit të Evropës në Bruges dhe një zyrtar të lartë të Komisionit Evropian u ndaluan nga Policia Federale Gjyqësore Belge të martën.

Pas marrjes në pyetje, të gjithë individët u informuan zyrtarisht për akuzat, të cilat kanë të bëjnë me mashtrimin në prokurim, korrupsionin, konfliktin e interesit dhe shkeljen e sekretit profesional, thuhet në një deklaratë.

Ata u liruan pas ndalimit, pasi nuk konsiderohen me rrezik arratisjeje.

EPPO theksoi se hetimi po vazhdon dhe nuk mund të jepen detaje të mëtejshme për të shmangur rrezikimin e rezultatit të tij dhe se të gjithë individët e përfshirë supozohen të pafajshëm derisa të dëshmohet fajësia para gjykatave kompetente belge.

EPPO është një zyrë e pavarur prokurorie e BE-së përgjegjëse për hetimin, ndjekjen penale dhe sjelljen para gjykimit të krimeve që ndikojnë në interesat financiare të bllokut.