Udhëheqësi i Partisë Laburiste britanike në Skoci, Anas Sarwar, bëri thirrje që Keir Starmer të japë dorëheqje si kryeministër i Mbretërisë së Bashkuar dhe si lider i Laburistëve, duke thënë se udhëheqja e vendit “duhet të ndryshojë”, raporton Anadolu.

Sarwar tha se vendimi “nuk është i lehtë dhe nuk është pa dhimbje”, por theksoi se prioriteti i tij është “vendi im, Skocia”.

“Kjo është arsyeja pse shpërqendrimi duhet të marrë fund. Dhe udhëheqja në ‘Downing Street’ duhet të ndryshojë”, deklaroi ai.

Sarwar paralajmëroi se problemet në Westminster rrezikojnë të minojnë perspektivat e Laburistëve në Skoci. “Nuk mund të lejojmë që dështimet në zemër të ‘Downing Street’ të nënkuptojnë që dështimet të vazhdojnë edhe këtu në Skoci, sepse zgjedhjet nuk janë pa pasoja për jetën e skocezëve”, tha ai.

“Situata në ‘Downing Street’ nuk është mjaft e mirë. Ka pasur shumë gabime. Ata premtuan se do të ishin ndryshe, por kanë ndodhur shumë gjëra”, shtoi ai.

Ndërsa pranoi se ka pasur edhe arritje, Sarwar tha se ato janë zbehur: “A ka pasur gjëra të mira? Sigurisht që ka pasur shumë, por askush nuk i di dhe askush nuk mund t’i dëgjojë, sepse po mbyten nga zhurma”.

Ndërkohë, “Downing Street” hodhi poshtë thirrjet për dorëheqjen e Starmerit, duke thënë se ai “ka një mandat të qartë pesëvjeçar nga populli britanik dhe do të vazhdojë të sjellë ndryshime”.

Starmer pritet t’u drejtohet deputetëve laburistë më vonë gjatë së hënës, teksa po përpiqet të forcojë mbështetjen brenda partisë së tij mes pasojave të skandalit “Peter Mandelson”, të lidhur me zbulime të reja në dosjet mbi abuzuesin e dënuar seksual Jeffrey Epstein.