Këshilli departamental Seine-Saint-Denis, një rreth në zonën metropolitane të Parisit, ka bërë thirrje që Izraelit t’i ndalohet pjesëmarrja në Shfaqjen Ajrore të Parisit, e cila do të zhvillohet nga 16 deri më 22 qershor në Le Bourget, transmeton Anadolu.

Stephane Troussel, president i Këshillit të Seine-Saint-Denis, në rrjetet sociale tha se nuk do të marrë pjesë në hapjen protokollare të ngjarjes, e cila pritet të inaugurohet nga presidenti Emmanuel Macron dhe kryeministri François Bayrou.

Ai shprehu kundërshtim të fortë ndaj pranisë së kompanive izraelite në ekspozitë.

“Ne nuk mund t’i shtrojmë tapetin e kuq një shteti të akuzuar nga Gjykata Ndërkombëtare Penale për veprime që mund të përbëjnë gjenocid, ndërsa në të njëjtën kohë pretendon se është i përkushtuar ndaj të drejtave të njeriut”, tha Troussel.

Ai konfirmoi se këshilli ka miratuar një rezolutë gjatë seancës së tij, duke i bërë thirrje Francës të njohë zyrtarisht Shtetin e Palestinës, të përjashtojë Izraelin nga Shfaqja Ajrore e Parisit, të kërkojë një armëpushim të menjëhershëm në Gaza dhe të sigurojë qasje të papenguar humanitare në enklavën e rrethuar.

"Ne do të vazhdojmë të mbështesim qytetet tona binjake në Palestinë dhe të kontribuojmë në rindërtimin e rajonit", tha Troussel, duke theksuar se "heshtja dhe indiferenca nuk është më një opsion".

Sipas të përditshmes franceze ‘20 Minutes’, rezoluta u miratua unanimisht nga anëtarët e këshillit.

Edicioni i 55-të i Shfaqjes Ajrore të Parisit, një nga ngjarjet më të mëdha hapësinore në botë, do të bashkojë kompani nga e gjithë bota. Ajo është planifikuar të zhvillohet nga 16 deri më 22 qershor në Le Bourget, i vendosur në departamentin Seine-Saint-Denis, jashtë kryeqytetit francez.