Një këlysh tigër sumatran dy muajsh e gjysmë, i quajtur “Lilly” dhe i lindur më 2 janar, u prezantua për publikun në kopshtin zoologjik Tierpark në Berlin, raporton Anadolu.

Emri Lilly u përzgjodh nga një juri e kopshtit zoologjik pas një procesi publik emërtimi, gjatë të cilit vizitorët propozuan më shumë se 1 mijë emra.

Këlyshi i vogël u shfaq për publikun pas ceremonisë zyrtare të emërtimit, duke tërhequr vëmendjen e vizitorëve të shumtë në kopshtin zoologjik.

Tigri sumatran është një nga nënllojet më të rrezikuara të tigrit në botë dhe jeton në ishullin Sumatra në Indonezi. Ai karakterizohet nga përmasat më të vogla krahasuar me tigra të tjerë dhe nga vijat më të dendura në trup.

Popullsia e tij në natyrë vlerësohet të jetë shumë e kufizuar, për shkak të humbjes së habitatit dhe gjuetisë së paligjshme, çka e bën lindjen e këlyshëve një zhvillim të rëndësishëm për ruajtjen e kësaj specieje të rrezikuar.