Kryeministri spanjoll, Pedro Sanchez, ka “dënuar fuqishëm” shkeljen e së drejtës ndërkombëtare në Venezuelë, duke iu referuar sulmeve të fundit të SHBA-së dhe arrestimit të presidentit të vendit, Nicolas Maduro, transmeton Anadolu.

“Shkelja e fundit e së drejtës ndërkombëtare në Venezuelë, një akt që ne e dënojmë fuqishëm, si dhe vuajtjet e popujve të Ukrainës dhe Palestinës, na kujtojnë sa e rëndësishme është të kemi një qeveri në Spanjë që mbron, gjithmonë dhe kudo, të drejtën ndërkombëtare dhe zgjidhjen paqësore të konflikteve”, tha Sanchez në një letër drejtuar partisë së tij Punëtorëve Socialistë (PSOE).

Ky dënim vjen pas deklaratave të tij të djeshme në të cilat ai refuzoi të njohë ndërhyrjen e SHBA-së.

"Spanja nuk e njohu regjimin e Maduros. Por as nuk do të njohë një ndërhyrje që shkel ligjin ndërkombëtar dhe e shtyn rajonin drejt një horizonti pasigurie dhe armiqësie", shkroi Sanchez në platformën sociale të kompanisë amerikane X.

Venezuela të shtunën herët tha se SHBA-ja sulmoi instalime civile dhe ushtarake në disa shtete dhe më pas shpalli një emergjencë kombëtare.

Dje, presidenti i SHBA-së, Donald Trump, konfirmoi sulmin “në shkallë të gjerë” dhe tha se Maduro dhe bashkëshortja e tij ishin kapur dhe ishin larguar me avion nga vendi. Më vonë, ai tha se SHBA-ja do të “drejtojë” Venezuelën derisa të sigurohet një tranzicion i sigurt dhe se do të rregullojë infrastrukturën e saj “të prishur” të naftës.

Maduro dhe bashkëshortja e tij janë dërguar në një qendër paraburgimi në New York dhe do të paraqiten në gjykatë për akuza të dyshuara për trafik droge.

Sulmet erdhën pas muajsh të presionit në rritje të SHBA-së ndaj Maduros, të cilin Washingtoni e akuzon për përfshirje në trafik droge, megjithëse presidenti venezuelas i kishte mohuar pretendimet dhe kishte shprehur gatishmëri për bisedime.